O Grupo Municipal da Marea de Vigo utilizará todas as vías que lle permita a Lei de Rexime Local e o Regulamento do Pleno para poñer claridade sobre todo o que rodea a adxudicación do contrato de alumeado a empresa Imesapi.
No día de onte xa o Grupo Municipal da Marea de Vigo, a través do seu voceiro, Rubén Pérez, denunciaba publicamente unha serie de irregularidades na xestión da concesión do contrato de alumeado a unha empresa cun vínculo familiar co Concelleiro do Goberno que participa na mesma, Concelleiro que ademáis en caso de empate de votacións na mesa disporía de voto dobre . Segundo a lexislación aplicable, non é compatible a participación na mesa si hai un vinculo de ata segundo grado de consanguinidade ou afinidade, como é o caso. Este asunto levou á mesa a emitir un informe valorando a situación, co cal o Grupo Municipal da Marea de Vigo non está dacordo, posto que sitúa a persoa vinculada a empresa nunha posición non decisoria, cando consideramos, tendo en conta os datos, non é o caso.
O Grupo Municipal da Marea de Vigo considera tamén que este problema podería terse evitado dun xeito tan sinxelo como que o concelleiro en cuestión non participase nesta mesa e o fixera outro no seu lugar. O feito de non facelo da a entender que se está actuando con tal descaro por parte deste goberno municipal que nin se preocupa por gardar as máis minimas formas democráticas de funcionamento.
Por isto, xa rematado o proceso de adxudicación, a Marea de Vigo levará o asunto ó Pleno e ademáis solicitará a apertura das comisións pertinentes para esclarecer o que está acontecendo e aconteceu con esta empresa e o Concello, a mesma que conseguiu empotrar cun salario de 97.000 euros como persoal subrogable ó xerente da mesma, e a mesma que está pasando por procesos xudiciais nestes intres con outros asuntos referentes a concesións públicas do Concello de Vigo e a supostas contratacións falsas de persoas afins o Goberno Municipal.
Do mesmo xeito, a Marea de Vigo considera que este asunto debe ser esclarecido no ámbito político e descarta acudir a sede xudicial, onde soamente acudíu ata o de agora pola reiterada negativa do Goberno Municipal a apertura de comisións de investigacións, nese caso, sobre a Operación Patos.
