O Grupo Municipal da Marea de Vigo, tal e como anunciou no seu día, enviou unha carta a cada representante na Xunta de Goberno da FEMP, onde se lles informa sobre os cambios introducidos no novo Regulamento do Pleno do Concello de Vigo, que converteuse no exemplo de xusto o contrario do que pretende ser unha institución como a FEMP, baseada nos principios de democracia e transparencia.
Rubén Pérez, voceiro do Grupo Municipal da Marea de Vigo, considera que “o máximo representante dos concellos do estado non pode promover a destrución da democracia local”, tal e como quedou reflectido na aprobación do novo regulamento do Pleno do Concello. Outra vez asistimos á “conversión dun desexo en lexislación” coa aprobación deste regulamento, elaborado a todas luces baixo unha cuestión conxuntural, como é o feito de que Abel Caballero sexa Alcalde de Vigo e de que o PsdeG-PSOE teña maioría absoluta neste Concello, tal e como se explica na carta enviada á Xunta de Goberno da FEMP.
O Grupo Municipal da Marea de Vigo parécelle unha falla total de coherencia o que promove o Código de boas prácticas da FEMP co novo regulamento do Pleno do Concello, outra demostración máis da imaxe que pretende dar o Alcalde cara a fóra, cando dentro do Concello a súa praxe baséase en actitudes “tiránicas” e antidemocráticas, amparándose sempre na maioría absoluta que ten. Feito que, de por sí, este Grupo Municipal sempre entendeu debería proporcionarlle certa tranquilidade á hora de gobernar, pero, tal e como leva demostrado neste primeiro ano de lexislatura, semella ser todo o contrario. Na carta a FEMP explícanse varios dos cambios no regulamento e o que van significar tanto para o traballo da oposición, como para a cidadanía que pretenda expresarse dalgún modo perante o Pleno do Concello, o mesmo tempo que o límite que pode chegar a establecer sobre os medios de comunicación.
