Estando dacordo co consenso existente entre os alcaldes dos municipios da Área Metropolitana, o Grupo Municipal da Marea de Vigo considera necesario o afondamento nas materias substanciais da propia área como o transporte, a RSU ou a xestión da auga, temas que non se definen co detalle que se precisa no actual proxecto.
O Grupo Municipal da Marea de Vigo considera insuficiente o contido da lei que vai ser debatida no parlamento galego, posto que soamente supón o 1% do conxunto das materias que deberían de ser debatidas na devandita lei e que serían competencia da Área Metropolitana. Actualmente a proposta está baseada na gobernanza da mesma, feito que é importante, pero non o único que debe existir na lei.
A Marea de Vigo, despois de non ter podido acceder o debate sobre a Lei de Área Metropolitana de Vigo, tal e como xa denunciou con anterioridade, onde solicitaba que este debate se dera no pleno como maior órgano de representación democrática do municipio, tal e como fixeron concellos como o de Cangas ou Moaña; vai presentar emendas substanciais sobre a mesma perante o parlamento galego, posto que considera, na liña do anteriormente exposto, que o debate sobre presidencias ou órganos xestores non poden deixar nun segundo plano asuntos tan importantes sobre os que se nos abre agora a posibilidade dun cambio real e efectivo como é a xestión do transporte, auga ou xestión de residuos. Non descartando, a través de AGE, solicitar a devolución da lei para a súa mellora.
