MILITANTES, SIMPATIZANTES E ACTIVISTAS SOCIAIS TRABALLARÁN ESTE SÁBADO 22 EN VIGO SOBRE OS PROCESOS DE UNIDADE DA ESQUERDA POLÍTICA E SOCIAL CON VISTAS AO PROCESO ELECTORAL DE DECEMBRO.
O coordinador local de EU en Vigo e voceiro do grupo municipal da MAREA DE VIGO, Rubén Pérez, considera que EU ten sido parte substancial de moitos procesos de encontro e construción de alternativas electorais, como é o caso de AGE ou das diferentes candidaturas municipais das que AS MAREAS teñen sido parte importante. “A disparidade de procesos, cada vez máis complexos e con diversos actores” require un debate serio e riguroso de como encarar a construción da unidade popular, da concreción dun programa alternativo e das metodoloxías de participación pública da cidadanía consciente.
Para o concelleiro da MAREA DE VIGO e coodinador local de EU o que buscan estas xornadas é “analizar o papel que xoguemos, pero tamén a actitude e o estilo que empreguemos na nosa relación con outras forzas políticas e movementos sociais, e que determinarán en gran medida a nosa credibilidade como actor político convencido da unidade popular e como axente activo dos procesos de confluencia.”
En Esquerda Unida moitos compañeiros e compañeiras levamos moitos anos confluíndo con movementos sociais e construíndo resistencias e converxencias colectivas, o que nos achega unha bagaxe experiencial considerable e unhas relacións consolidadas sobre as que cimentar a promoción da Unidade Popular.
No marco desta xornada tamén trataremos exemplos exitosos de construción de unidade popular como a dos municipios de Madrid, Zaragoza, A Coruña e Barcelona.
